एजेन्सी– विश्वभर कोरोना भाइरस (कोभिड–१९)को प्रकोप देखिएपछि युरोपियन फुटबल संघ (यूईएफए)ले आज (मंगलबार) युरोपको फुटबलको भविष्यबारे निर्णय लिन भिडियो सम्मेलन गर्दैछ।
संघले सम्मेलनबाट फुटबलको ठोस योजना बनाइने बताएको हो।
बैठकमा सन् २०२० मा हुने तय भएको युरोकप २०२१ सम्म सार्न सकिने वा नसकिने बारेमा पनि छलफल गर्ने बताइएको छ। यो वर्ष हुने युरोकपको समयमा लिगका प्रतियोगिताहरू नसकिने देखिएपछि युरोकप सार्नेबारे छलफल हुनेछ।
युरोकप सरे नेसन्स लिग फाइनल खेल पनि पछि धकेलिनेछ। यो अवस्थामा नेसन्स लिगको फाइनल सन् २०२१ को अन्त्यमा हुन कतिपयको आँकलन छ। यस्तै, पुरुष यु–२१ र महिलाको युरोपियन च्याम्पियनसिप सन् २०२२ मा सारिने भएको छ।
यसअघि युरोपमा जारी च्याम्पियन्स लिग र युरोपा लिगका खेलहरू कोरोनाको असर देखिएपछि स्थगित भएका छन्। कोरोना असर समाप्त भएपछि मात्र यी दुवै लिगका स्थगित प्रतियोगिता सञ्चालन हुने यूईएफएले जनाएको छ।
यूईएफएले आजको सम्मेलनमा यस वर्ष हुने भनिएको युरोकप अर्काे वर्ष सार्ने प्रस्ताव लैजादैछ।
सम्मेलनमा युरोपियन क्लब तथा खेलाडी संघका प्रतिनिधि, यूईएफए र विभिन्न राष्ट्रिय लिगका अफिसियलहरूको सहभागिता रहनेछन्। यसमा युरोपियन राष्ट्रका ५६ संघ भिडियो सम्मेलनमा सहभागी हुने छन्।
कोरोना भाइरसको असर बढेपछि युरोपमा च्याम्पियन्स लिग र युरोपा लिगका धेरै खेलहरू दर्शक नभएका रंगशालामा खेलाइएका छन्। तर, यसले फुटबलको महत्त्व घटेको कतिपयको भनाइ छ।
पछिल्लो समय कोरोनाको संक्रमण खेलाडीमा पनि देखिन थालेपछि खेल नै स्थगित भएका हुन्।