आइतबार, जेठ १८, २०७७

समाचार

दार्चुलाकाे गागामा सशस्त्रको गुल्म, स्थानीय बासिन्दा खुसी

1589613374DSC03483.jpg
नेपाल–भारत सीमा क्षेत्र दार्चुलाको व्यास गाउँपालिका–१ छाङरु (गागा) मा सशस्त्र प्रहरीको गुल्म बस्ने स्थानको जग्गा नापजाँच गर्दै सशस्त्र प्रहरीका इन्जिनियर प्रहरी नायब उपरीक्षक मिलनमान मास्केलगायतको टाेली। तस्बिर : रासस

दार्चुला- व्यास गाउँपालिका–१ स्थित त्रिदेशीय नाकाका रूपमा रहेको सामरिक महत्वको छाङ्रु (गागा) मा सरकारले सशस्त्र प्रहरीको गुल्म राख्ने तयारी थालेको छ। बुधबार सशस्त्र प्रहरीको सीमा निगरानी चौकी (बीओपी) स्थापना गरिएको यहाँ १६० सशस्त्र प्रहरी रहने गरी गुल्म नै स्थापना गर्न आवश्यक प्रक्रिया सुरु गरिएको छ।

सशस्त्र प्रहरीको इन्जिनियर टोली सो क्षेत्रको नापनक्सा गरेर फर्किएको छ। लकडाउनलगत्तै भवन निर्माणका लागि बोलपत्र आह्वान हुनेछ। गुल्ममा सशस्त्र प्रहरी नायब उपरीक्षकको नेतृत्वमा १६० जनाको टोली रहने छ।

उक्त गुल्मले कालापानी, लिपुलेक, व्यास गुफा, कैलाश मानसरोवरको प्रवेशद्वार तथा अपिनाम्पा संरक्षण क्षेत्रजस्ता सामरिक महत्व बोकेको ऐतिहासिक, धार्मिक तथा पर्यटकीय क्षेत्रको सुरक्षा गर्नेछ।

सकेसम्म छिटो गुल्म स्थापना गर्ने तयारी गरिएको र यसबाट सीमा रक्षा, आपराधिक क्रियाकलाप नियन्त्रण तथा सर्वसाधारणको शान्ति सुरक्षामा महत्वपूर्ण कदम हुने दार्चुलाका प्रमुख जिल्ला अधिकारी यदुनाथ पौडेलले जानकारी दिए।

गुल्मका लागि अपिनम्पा संरक्षित क्षेत्रको मातहतमा रहेको कित्ता नं ३५ को ११५ रोपनी तीन आना जग्गामध्ये तिंकर नदीको किनारको १५ रोपनी जग्गा सशस्त्र प्रहरीलाई प्राप्त भइसकेको छ।

गृह मन्त्रालयबाट बहुवर्षीय योजनाअनुरुप संरचना निर्माणका लागि ११ करोड रकम विनियोजन गरिसकिएको छ। 

सशस्त्र प्रहरीका इन्जिनियर प्रहरी नायब उपरीक्षक मिलनमान मास्केसहितको टोलीले गुल्मका लागि प्राप्त जग्गाको बिहीबार स्थलगत रूपमा पुगेर आवश्यक नापजाँच गरेको छ।

सुरक्षाका दृष्टिले यहाँको सामरिक महत्व रहेकाले सरकारले उक्त क्षेत्रलाई उच्च प्राथमिकतामा राखेको छ। अन्य क्षेत्रमा सुरक्षाफौज तैनाथ गर्ने योजना रहे पनि पहिलो प्राथमिकतामा यहाँको गुल्म छ।

भवन आधुनिक प्रविधियुक्त र यहाँको वातावरण सुहाउँदो बन्नेछ। बाह्रैमहिना चिसो हुने र जाडोको समयमा अत्यधिक हिउँ पर्ने भएकाले त्यस अनुकूलको संरचना निर्माण गरिनेछ।

सन् १९६२ मा भारत–चीनसँगको द्वन्द्वका बेला यहाँको कालापानीलगायत क्षेत्रमा भारतले सेना प्रवेश गराएको थियो। त्यो बेला राखिएको सेना अझै कालापानीमा छ।

दार्चुलाका प्रजिअ पौडेलका अनुसार पहिले त्यस आसपास क्षेत्रमा नेपालको पाँच इलाका थियो। तिङकर र छाङ्रु नेपालमा छ। नेपालको तिकु र गुन्जी भारतीय नियन्त्रणमा छ।

भारतले काली नाघेर कालापानी तल भएर बग्ने अर्को नदीलाई कालीको नाम दिई सीमा नदी बनाएर विवाद निकाल्दै आएको छ।
त्यसैले पनि सरकारले यहाँ गुल्मको सोच राखेर त्यस आसपासका सीमा क्षेत्रमा बीओपी स्थापना गर्ने योजना अघि सारेको हो।

सशस्त्र प्रहरीको नं ५० गुल्मका प्रमुख प्रहरी नायब उपरीक्षक डम्बरबहादुर विष्टले गुल्म बसेपछि सो क्षेत्रको सुरक्षा मजबुत हुने बताए।
भारतले महाकाली नदी किनारकिनारै सडक बनाएर गुन्जी, कालापानी हुँदै लिपुभन्ज्याङसम्म पुर्याएको छ। तर नेपालतर्फ कुनै प्रयास छैन।
“राज्यको उपस्थिति अहिलेका लागि ठूलो हो। सीमा क्षेत्रमा सशस्त्र मात्रै होइन, प्रहरीका दुई समूहसमेत पु¥याएकाले आपराधिक गतिविधि नियन्त्रण, जनताको सुरक्षा र सीमा रक्षाका लागि दूरगामी र ऐतिहासिक कदम भएको छ”, प्रजिअ पौडेलले भने।

व्यास गाउँपालिका–१ छाङ्रुमा ११५ घरधुरी छ। १० किलोमिटर पर रहेको तिंकरमा ६८ घरधुरी छ। यहाँबाट कालापानी झन्डै १५ किलोमिटरको दूरीमा पर्छ। तिंकरबाट लिपुलेक अन्दाजी १० किलोमिटर दूरीमा रहेको स्थानीय जितबहादुर बोहराले बताए। सशस्त्र प्रहरी आएपछि भने यहाँका स्थानीयमा छुट्टै खुसी छाएको छ। -रासस

प्रतिक्रिया दिनुहोस्