सुर्खेत- डोल्पामा शुक्रबार परेको हिमपातले घर भत्किँदा एकै घरका दुई दिदीबहिनीको मृत्यु भएको छ।
डोल्पाको त्रिपुरासुन्दरी नगरपालिका ४ को बमबहादुर बुढाको घर भत्किँदा उनका छोरीहरु १२ वर्षीया मञ्जु बुढा र २ वर्षीया लक्ष्मी बुढाको घटनास्थलमै मृत्यु भएको जिल्ला प्रहरी कार्यालय डोल्पाले जनाएको छ।
डोल्पाका डीएसपी नारायण सञ्जितकारका अनुसार बमबहादुर वुढाकी श्रीमति रणमती बुढासमेत गम्भीर घाइते भएका छन्।
रणमतिको जिल्ला अस्पताल दुनैमा उपचार भइरहेको प्रहरीले जनाएको छ। अत्यधिक हिमपातका कारण आज बिहान तला थप्दै गरेको घर भत्किएको हो।
‘घरको माथिल्लो तला बनाउँदै गरेको रहेछ, तर तल्लो तलामा भने परिवारहरु बस्थे’ डीएसपी रञ्जितकारले भने ‘सुतिरहेकै अवस्थामा भित्ता भत्किएको रहेछ, तत्काल उद्धार हुन नसक्दा घटनास्थलमै मुत्यु भयो।’
बमबहादुर र उनका छोरा उपेन्द्र बुढा भने सकुशल रहेका छन्। बाबुछोरा छुट्टै घरमा सुतेका थिए।