दाङ– जिल्लामा पछिल्लो समय बैंकिङ अपराधका घटना बढ्दै गएका छन्।
जिल्ला प्रहरी कार्यालय, दाङका अनुसार बैंकिङ कसूर र कम्पनीसम्बन्धी विवादका मुद्दाको चाप छन्। “विगतमा बैंकिङ कसूरका घटना धेरै थिएनन्,” जिल्ला प्रहरी कार्यालयका अनुसन्धान अधिकृत राजन गौतमले भने, “तर, पछिल्ला वर्षमा बढ्दै जान थालेका छन् ।” उनक अनुसार चालु आर्थिक वर्ष २०७६/०७७ को हालसम्म आठ वटा मुद्दा दर्ता भएका छन्।
मुद्दा दर्ता भएका बैंकिङ अपराधका घटनामध्ये करिब ९० प्रतिशत व्यक्ति पक्राउ परिसकेको उनको भनाइ छ। केही व्यक्ति भने फरार रहेको उनले बताए।
सहरी क्षेत्रमा बैंक तथा वित्तीय संस्थाको वृद्धि भएसँगै यससम्बन्धी मुद्दा पनि बढ्दै जान थालेको उनको भनाइ छ। विश्वासकारूपमा लिएको चेकमा समेत बेइमानी बढेका कारण यस्ता घटना बढ्दै जान थालेका गौतमले बताए। उनका अनुसार दाङमा गत आव २०७५/०७६ मा ११ वटा बैंकिङ अपराधका घटनाका मुद्दा दर्ता भएका थिए।
जुनसुकै तह तप्काका मानिस पनि चेक बाउन्सका घटनामा संलग्न भएको उनको भनाइ छ। आर्थिक कारोवार गर्दा सबै सचेत हुने दिन आएको उनले बताए।
प्रहरीले चेक बाउन्सको उजुरी परेपछि दुवै पक्षलाई बोलाएर छलफल गराएर मिल्ने समयसमेत दिँदै आएको प्रहरी निरीक्षक गौतमकाे भनाइ छ। पीडित र पीडक पक्ष नमिलेको खण्डमा मात्र प्रहरीले पीडित पक्षको उजुरी लिने गरेको उनले जानकारी दिए।
रासस