काठमाडौं– अख्तियार दुरुपयोग अनुसन्धान आयोगको टोलीले डिभिजन वन कार्यालय, दोलखाकी प्रमुख उपसचिव सन्तमाया श्रेष्ठ दुई लाख घुससहित पक्राउ गरेको छ।
सेवाग्राहीबाट घुस लिएर दोलखाबाट काठमाडौं फर्कँदै गरेको अवस्थामा श्रेष्ठलाई बिहीबार साँझ दुई लाख तीन हजार पाँच सय रूपैयाँसहित भक्तपुर गठ्ठाघरबाट पक्राउ गरेको अख्तियारले जनाएको छ।
श्रेष्ठ बा१झ ७६८५ नम्बरको सरकारी गाडीबाट काठमाडौं आउँदै गरेको अवस्थामा अख्तियारको टोलीले नियन्त्रणमा लिएको प्रवक्ता प्रदीपकुमार कोइरालाले जानकारी दिए।
श्रेष्ठसँगै अन्य तीन जनालाई पनि नियन्त्रणमा लिई अनुसन्धान भइरहेको कोइरालाले बताए। उनीसँगै पक्राउ पर्नेमा कार्यालय सहयोगी र चालक रहेको अख्तियारले जनाएको छ।
श्रेष्ठले काठ व्यापार गर्ने व्यापारीहरूसँग घुस लिएकोवारे अख्तियारमा उजुरी परेको जनाइएको छ।