जनकपुरधाम– प्रदेश २ का मुख्यमन्त्री लालबाबु राउत ‘महामूर्ख’ घोषित भएका छन्। मिथिला नाट्यकला परिषद्ले होलीको अवसरमा आयोजना गरेको महामूर्ख सम्मेलनमा राउत यस वर्षको महामूर्ख घोषित भएका हुन्।
मिथिला नाट्यकला परिषद्ले हरेक वर्ष होलीको अवसरमा राजनीतिज्ञ, साहित्यकार, सामाजिक अभियन्तामध्ये एकजनालई महामूर्खको उपाधि दिने गरेको छ। उपाधि महामूर्खको भए पनि सामाजिक वा राजनीतिक क्षेत्रमा उच्च योगदान दिने व्यक्तिलाई प्रदान गरिन्छ ।
महामूर्खको साथै विभिन्न राजनीतिकर्मी तथा साहित्यकारहरुलाई अन्य व्यंंग्यात्मक मानपदवीले सम्मानित गरिएको छ। यसरी सम्मानित हुनेहरुमा प्रदेश २ का राजपाका प्रमुख सचेतक परमेश्वर साह, समाजवादी पार्टीका उपनेता रामआशिष यादव, प्रदेशसभा सदस्य मनिष सुमन, मैथिली विकास कोषका अध्यक्ष जीवनाथ चौधरी, नेपाल पत्रकार महासंघ धनुषाका अध्यक्ष अनिल मिश्र, युवा अभियन्ता सुशील कर्णलगायत छन्।
मिथिला नाट्यकला परिषद्ले होलीको अवसर पारेर विगत २६ वर्षदेखि महामूर्ख सम्मेलनको आयोजना गर्दै आइरहेको छ।