१२ वर्षपछि समातिएका पत्रकार साहकाे हत्या आरोपी सार्वजनिक

काठमाडौं– बाराका पत्रकार वीरेन्द्र साहको हत्याका आरोपी कुन्दन फौजदार पक्राउ परेका छन् ।शनिबार राति बाराको बारागढी गाउँपालिका–६ गडहलगाउँस्थित घरैबाट फौजदार पक्राउ परेको प्रहरीले जनाएको छ।

बारा प्रहरीले आज पत्रकार सम्मेलन गरी फौजदारलाई सार्वजनिक गरेको छ। २०६४ साल कात्तिक १८ गते पत्रकार साहलाई बाराको ढोडिया पिपरागाउँ नजिकैबाट तत्कालीन सशस्त्र माओवादी कार्यकर्ताले अपहरण गरेका थिए।

अपहरित पत्रकार साहको अवस्था सार्वजनिक गर्न आवाज उठ्न थालेपछि खोजतलास गर्दै जाँदा अपहरणको झण्डै एक महिनापछि शव फेला पारेको थियो।

साहको हत्यामा संलग्न रहेको आरोपमा तत्कालीन माओवादी कार्यकर्ता हरेराम पटेललगायत दुई जनालाई प्रहरीले पक्राउ गरिसकेको थियो।

साह तत्कालीन स्पेस नेटवर्कबाट सञ्चालित स्पेसटाइम दैनिक र मनकामना एफएम हेटौंडाको संवाददाता थिए।