काठमाडौं । नेपाल पुनर्बीमा कम्पनीले चैत ४ गतेदेखि सर्वसाधारणको लागि साधारण सेयर (आइपीओ) खुला गर्ने भएको छ ।
कम्पनीले एक अर्ब ६० करोड रुपैयाँ बराबरको आईपीओ एक सय रुपैयाँ प्रति कित्तामा एक करोड ५१ लाख २६ हजार ५ सय कित्ता सेयर जारी गर्न लागेको हो । कम्पनीको सेयरमा सर्वसाधारणले न्यूनतम १० कित्ता र अधिकतम १० हजार कित्तासम्मका लागि आवेदन दिन पाउनेछन् ।
कम्पनीले जारी गर्न लागेको एक करोड ६० लाख कित्ता सेयरमध्ये कर्मचारीलाई ७३ हजार ५ सय कित्ता र सामूहिक लगानी कोषलाई ८ लाख कित्ता बाँडफाँड गरिसकेको छ ।
आइपीओको लागि आवेदन दिने समय छिटोमा चैत ७ र ढिलोमा चैत १८ गतेसम्म तोकिएको छ । कम्पनीले जारी गर्न लागेको साधारण सेयरलाई क्रेडिट रेटिङ कम्पनी इक्रा नेपालले आइपिओ ग्रेड–२ रेटिङ गरेको छ । रेटिङले यो आइपिओलाई औशत भन्दा राम्रो रहेको प्रमाणित गरेको छ ।
कम्पनीको सेयर निश्कासन तथा बिक्री प्रवन्धक आरबीबी मर्चेन्ट रहेको छ ।
१० अर्व जारी पुँजी रहेको कम्पनीले १६ प्रतिशत साधारण सेयर बिक्री गर्न लागेको हो । हाल आठ अर्ब ४० करोड रुपैयाँ चुक्ता पुँजी रहेको कम्पनीको साधारण सेयर बिक्रीपछि पुँजी १० अर्ब पुग्नेछ ।
सार्वजनिक तथा निजी साझेदारी नीतिअन्तर्गत सरकारको समेत स्वामित्व रहेको नेपाल पुनर्बीमा कम्पनीले २०७२ साल साउन १ गतेदेखि कारोबारको सुरु गरेको हो । कम्पनीले स्वदेशका जीवन तथा निर्जीवन बीमा कम्पनी र विदेशी बिमा तथा पुनर्बिमा कम्पनीहरूसँग कारोबार गर्दै आएको छ ।
आर्थिक वर्ष ०७४–्७५ सम्ममा कम्पनीले कुल ४ अर्ब रुपैयाँ पुनर्बीमा शुल्क संकलन तथा ९ अर्ब ४० करोड रुपैयाँ लगानी गरेको जनाएको छ ।