होलीका बेला समूहमा जम्मा हुन, भिडभाड गर्न नपाइने

काठमाडौं- रंगहरुको पर्व होली यो वर्ष काठमाडौं उपत्यकामा समूहमा खेल्न, होलीका बेला कन्सर्ट र भिडभाडका कार्यक्रम आयोजना गर्न नपाइने भएको छ ।

जिल्ला सुरक्षा समन्वय समितिको बुधबार बसेको बैठकले कोरोना भाइरसको जोखिमलाई ध्यान दिँदै होलीका बेला भिडभाड र भेला गर्न नपाइने निर्णय गरेको हो । बैठकले एकै ठाउँमा धेरै व्यक्ति भेला हुन नदिने पनि निर्णय गरेको छ ।

प्रमुख जिल्ला अधिकारी जनकराज दाहालका अनुसार भिडभाड र जमघट हुने ठाउँमा कोरोना भाइरसको सङ्क्रमण हुने खतरा भएकाले रोक लगाइएको हो ।

होली मात्रै होइन अन्य पर्व, उत्सव, मेलालगायतका नाममा एकैठाउँमा जमघट हुन पनि रोकिएको उनले बताए । यो निर्णय उलंघन गर्नेलाई प्रहरीले नियन्त्रणमा लिई कारबाही गर्ने भएको छ ।

जथाभावी पानी छ्याप्ने, रंङ दल्ने र समूह बनाएर होली खेल्दै हिड्नेलाई पनि कारबाही गरिने प्रमुख जिल्ला अधिकारी दाहालले जानकारी दिए ।

काठमाडौंबाहेकका अरु जिल्लामा पनि सकेसम्म होली नखेल्न सरकारले आग्रह गरेको छ । भिड र समूहमा होली खेल्दा सङ्क्रमणको जोखिम हुन सक्ने भएकाले सकेसम्म होली नखेल्न सरकारले आग्रह गरेको हो ।

यस्तै बुधबारको बैठकले काठमाडौंमा सार्वजनिक रुपमा आयोजना हुने औपचारिक कार्यक्रमका लागि अनिश्चितकालसम्मका लागि स्वीकृति नदिने पनि निर्णय गरेको छ ।