६ सचिवको सरुवा, को कहाँ पुगे ?

काठमाडौं– सरकारले ६ सचिवको सरुवा गरेको छ। आइतबार साँझ बसेको मन्त्रिपरिषद् बैठकले ६ सचिवको सरुवा गरेको हो। यस्तै, बैठकले एक–एक सचिव र कामु सचिवको पदस्थापन गरेको छ।

बैठकले संघीय मामिला तथा सामान्य प्रशासन मन्त्रालयमा भूमि व्यवस्था तथा गरिबी निवारण मन्त्रालयका सचिव सूर्य गौतमको सरुवा गरेको छ।

काठमाडौं महानगरपालिकाका प्रमुख कार्यकारी अधिकृत केदार न्यौपाने भूमि व्यवस्था तथा गरिवी निवारण मन्त्रालयमा सरुवा भएका छन्। स्वास्थ्य तथा जनसंख्या मन्त्रालयका सचिव खगराज बराल उपराष्ट्रपति कार्यालयमा सरुवा भएका छन्। संघीय मामिला तथा सामान्य प्रशासन मन्त्रालयका सचिव यादव कोइराला स्वास्थ्य तथा जनसंख्या मन्त्रालयमा सरुवा भएका छन्।

त्यस्तै, उद्योग वाणिज्य तथा आपूर्ति मन्त्रालयकी सचिव यमकुमारी खतिवडा महिला बालबालिका तथा ज्येष्ठ नागरिक मन्त्रालयमा सरुवा भएकी छन्। उद्योग वाणिज्य तथा आपूर्ति मन्त्रालयमा महिला बालबालिका तथा ज्येष्ठ नागरिक मन्त्रालयका चन्द्र घिमिरेलाई ल्याइएको छ।

नयाँ बढुवा भएका सचिव एकनारायण अर्याललाई बैठकले काठमाडौं महानगरपालिकाको प्रमुख कार्यकरी अधिकृतमा पदस्थापन गरेको छ भने कामु सचिवमा बढुवा भएका सहसचिव रामशरण पुडासैनीलाई अर्थ मन्त्रालयको राजश्व सचिवको जिम्मेवारी दिइएको छ।

सरुवा र पदस्थापन भएका सबै सचिवले मंगलबार पत्र बुझेको मन्त्रिपरिषद्को कार्यालयले जनाएको छ।