काठमाडौं- कोरोना भाइरसको जोखिम बढ्दै गएपछि सरकारले आजबाट श्रम स्वीकृति दिन बन्द गरेको छ । सर्वोच्च अदालतको आदेशअनुसार कोरोना भाइरस प्रभावित देशमा जाने नेपालीलाई श्रम स्वीकृति दिन पनि बन्द गरिएको हो ।
सर्वोच्चले सोमबार संयुक्त अरब इमिरेट्स (यूएई) कुवेत, जापान, दक्षिण कोरिया, इटली र चीन जान रोक लगाउन आदेश दिएको थियो ।
वैदेशिक राेजगार विभागका महानिर्देशक कुमारप्रसाद दाहालले सर्वोच्चले नेपाली पठाउन रोक लगाएका ती देशमा श्रम स्वीकृतिको काम आजबाटै रोकिएको जानकारी दिए ।
यसैबीच सरकारले अत्यावश्यक काम बाहेक विदेश नजान नेपालीलाई आग्रह गरेको छ। कोरोना भाइरसको सङ्क्रमण बढ्दै गएकाले अत्यावश्यक काम भएका बाहेकलाई विदेश नजान सरकारले आग्रह गरेको हो।
सरकारले देशभित्र पनि भोजभतेर तथा सभा, सम्मेलन नगर्न पनि अनुरोध गरेको छ।
बहराइन हिँडेका ३० नेपालीलाई दुबईबाट फर्काइयो
वैदेशिक रोजगारीका लागि यूएई हुँदै बहराइन जान लागेका ३० जना नेपालीलाई दुबईबाट फर्काइएको छ ।
कोरोना भाइरसको जोखिम उच्च भएको भन्दै संयुक्त अरब इमिरेट्स (यूएई) सरकारले दुबई पुगेका ३० जना नेपालीलाई फिर्ता पठाएको हो।
कोरोना भाइरसको सङ्क्रमण बढ्दै गएकाले अत्यावश्यक कामबाहेक नेपालीलाई विदेश नजान सरकारले आग्रह गरेको छ। विश्व स्वास्थ्य सङ्गठनले नेपाललाई कोरोना भाइरसको उच्च जोखिममा राखेको छ।