कञ्चनपुरमा एक दम्पत्तिको विभत्स हत्या

धनगढी - कञ्चनपुरमा एक दम्पत्तिको हत्या भएको छ। शुक्लाफाँटा नगरपालिका-११ कलुवापुरमा धारिलो हतियार प्रयोग गरी एक दम्पत्तिको हत्या भएको खुलेको छ। प्रहरीका अनुसार ५० वर्षीय जयलाल भण्डारी र उनकी पत्नी २० वर्षीय धनादेवीको शव घर भित्र भेटिएको छ।

कञ्चनपुरका प्रहरी निरीक्षक सुरज कार्कीले धारिलो हतियार प्रयोग गरेर दम्पत्तिको हत्या भएको प्रारम्भिक अनुसन्धानबाट खुलेको जानकारी दिए। जयलालको शव कोठामा र धनादेवीको शव भान्सामा फेला परेको उनले जानकारी दिए।

जयलालको घाँटीमा र धनादेवीको टाउको र हातमा चोट देखिएको प्रहरीले जनाएको छ। भण्डारी दम्पत्तिको साथमा सात महिनाको बच्चा मात्र रहेको र घरमा अरु कोही नभएको अवस्थामा रातिको समयमा घटना भएको प्रहरीले जनाएको छ।

घटनाबारे दिउँसो करिब २ बजे मात्र जानकारी पाएको प्रहरीले जनाएको छ। धनादेवी भण्डारीकी दोस्रो श्रीमती हुन्। पहिलो पत्निबाटको छोराछोरी घर बाहिर रहेको खुलेको प्रहरीले जनाएको छ। घटनाबारे थप अनुसन्धान भैरहेको प्रहरीले जनाएको छ। भण्डारी दम्पत्तिको शव पोष्टमार्टमका लागि अस्पताल पुर्‍याइएको प्रहरीले जनाएको छ।