सवारी दुर्घटनामा महिलाको मृत्यु

तनहुँ– पृथ्वी राजमार्गअन्तर्गत तनहुँको व्यास नगरपालिका–१२, देउरालीमा आज (शनिबार) बसको ठक्करबाट महिलाको ज्यान गएको छ।

दमौलीबाट मुग्लिङतर्फ जाँदै गरेको ग१ख ९६१८ नम्बरको बसले ठक्कर दिँदा अन्दाजी ६५ वर्षीया महिलाको ज्यान गएको हो।

मृतकको सनाखत हुन नसकेको जिल्ला प्रहरी कार्यालयका प्रहरी नायब उपरीक्षक लीलाराज लामिछानेले जानकारी दिए। सोही बसमा सवार महिला ओर्लिएपछि बसको पांग्राले किचेको थियो।

घाइते महिलाको दमौली अस्पतालमा उपचार गर्न लैजाने क्रममा बाटोमा नै ज्यान गएको प्रहरीले जनाएको छ। बस र चालक प्रहरी नियन्त्रणमा छन्।