काठमाडौं- बालुवाटार जग्गा प्रकरणमा पूर्वप्रधानमन्त्रीद्वय माधवकुमार नेपाल र बाबुराम भट्टराईविरुद्ध भ्रष्टाचार मुद्दा चलाउने आदेश माग्दै सर्वोच्च अदालतमा रिट दायर भएको छ।
बालुवाटारस्थित ललिता निवासको सरकारी जग्गा व्यक्तिका नाममा दर्ता गराउन संलग्न रहेको आराेपमा अख्तियार दुरूपयोग अनुसन्धान आयोगले १७५ जनाविरुद्ध मुद्दा चलाएको छ।
तर, पूर्वप्रधानमन्त्रीद्वय भट्टराई र नेपाललाई नीतिगत निर्णयमात्र गरेको भन्दै अख्तियारले मुद्दा नचलाउने निर्णय गरेको छ। सरकार प्रमुखले गरेका नीति निर्णयमा आफूले मुद्दा चलाउन सक्ने अधिकार नभएको अख्तियारको अभियोगपत्रमा उल्लेख छ।
वरिष्ठ अधिवक्ता बालकृष्ण न्यौपानेले अख्तियारले छुट दिएका दुवै पूर्वप्रधानमन्त्रीलाई मुद्दा चलाउने आदेश दिन माग गर्दै बुधवार सर्वोच्चमा रिट दायर गरेका हुन्।
अधिवक्ता न्यौपानेले अख्तियारले नीतिगत निर्णय गरेको भने पनि उक्त निर्णय नीतिगत नभई कानुन विपरीतको निर्णय रहेको बताएका छन्।
सर्वोच्चले उक्त रिटको पेसी शुक्रबारका लागि तोकेको छ।