महालक्ष्मी विकास बैंकद्वारा थालेसेमिया प्रोजेक्टलाई सहयोग

काठमाडौं– महालक्ष्मी विकास बैंक लि. ले आफ्नो संस्थागत सामाजिक उत्तरदायित्व अन्तर्गत विभिन्न कार्यहरु गर्र्दै आइरहेको छ । सोही कार्यलाई निरन्तरता दिँदै बैंकको बिराटनगर शाखाले थालेसेमिया रोगबाट ग्रसित बालबालिकाको स्वास्थ्य उपचारका लागि स्थापित सुगन्धा थालेसेमिया प्रोजेक्टलाई दुई लाख ५० हजार रुपैयाँको आर्थिक सहयोग प्रदान गरेको छ ।

उद्योग, वाणिज्य तथा आपूर्ति राज्य मन्त्री मोतिलाल दुगडको प्रमुख आतिथ्यतामा सम्पन्न समारोहका बीच बैंकको विराटनगर शाखाका प्रबन्धक भरत खतिवडाले उक्त रकमको चेक हस्तान्तरण गरेका थिए ।

देशका शहरी तथा ग्रामीण क्षेत्रका विभिन्न स्थानहरुमा १०२ वटा शाखा तथा ३५ वटा एटिएमहरुमार्फत सेवा प्रदान गरिरहेको महालक्ष्मी विकास बैंक लि. को ग्राहक संख्या करिब पाँच लाख रहेको छ । बैंकले आगामी दिनहरुमा पनि सामाजिक उत्तरदायित्व अन्तर्गत अझै प्रभावकारी कार्यक्रमहरु गर्दै जाने प्रतिबद्घता जनाएको छ ।