धनगढी- जंगली जनावर बदेलको आक्रमणबाट बाजुरा र डोटीमा ८ जना घाइते भएका छन्।
बाजुरामा ७ र डोटीमा १ जना घाईते भएको प्रहरीले जनाएको छ। बाजुराको गौमुल गाउँपालिका–३ माझपालिमा रहेको धर्मोदय आधारभुत विद्यालयको सरसफाईमा जुटेका सात जनालाई आइतबार बदेलले आक्रमण गरी घाइते बनाएको छ।
घाइते हुनेमा ५० वर्षीय जगत विश्वकर्मा,४० वर्षीय पूर्ण विक, ५० वर्षीय डवल रोकाया,४५ वर्षीय धनबहादुर रोकाया, ४० वर्षीय प्रेम रोकाया,४० वर्षीय मेश रोकाया र ४२ वर्षीय लाल कामी रहेको रहेको जिल्ला प्रहरी कार्यालय बाजुराका प्रहरी निरिक्षक दान बहादुर रोकायाले जानकारी दिए।
घाइते भएका मध्ये जगत विश्वकर्माको अवस्था गम्भीर रहेको छ । उनलाई जिल्ला अस्पतालमा उपचार सम्भव नभएपछि बाहिर रेफर गरिएको अस्पतालले जनाएको छ।
बदेलको आक्रमणमा परी घाइते भएका चार जनाको गौमुल स्वास्थ्य चौकीमा उपचार पछि घर फर्किएको प्रहरीले जनाएको छ।
बँदेलको आक्रमणबाट डोटीमा एक महिला गम्भीर घाइते भएकी छन् । केआइसिंह गाउँपालिका– ७ की तुल्सी भण्डारी गम्भीर घाइते भएकी हुन् ।
घरबाट कुराउलो सामुदायिक बनको बाटो हुँदै शिखर नगरपालिका- १ कपल्लेकी आफन्तको घर जाँदै गरेको अवस्थामा आइतबार बँदेलले आक्रमण गरेको थियो ।
घाइते भण्डारीको राजपुर स्थित सुजंङ्ग अस्पतालमा उपचार भैरहेको छ । आक्रमणबाट घाइते भहिलाको अनुहार क्षतविक्षत भएको सुजङ्ग अस्पतालका डाक्टर मोहन पुजारीले जानकारी दिए।