शनिबार, जेठ १७, २०७७

समाचार

सेती प्रादेशिक अस्पतालमा प्रसूति सेवा बन्द

1585371982seti_hospital.jpg

कैलालीको धनगढीस्थित सेती प्रादेशिक अस्पतालले दिँदै आएको प्रसूति सेवा आजदेखि बन्द गरेको छ। उक्त अस्पताललाई कोरोना विशेष अस्पताल तोकिएपछि अर्को सूचना जारी नभएसम्मका लागि प्रसूति सेवा बन्द गर्ने निर्णय भएको हो।

वैशाख १ गते सामाजिक विकास मन्त्री कृष्णराज सुवेदीको अध्यक्षतामा बसेको बैठकले सेती प्रादेशिक अस्पतालको प्रसूति सेवा बन्द गरी सो सेवा नवजीवन अस्पतालमा दिने व्यवस्था मिलाउन अस्पताललाई निर्देशन दिने निर्णय गरेको थियो।

सोही निर्देशन अनुसार प्रसूति सेवा बन्द गरिएको सेती अस्पतालले जनाएको छ। अब प्रसूति सेवाको कार्य कैलालीको धनगढीमा रहेको नवजीवन अस्पतालले गर्ने भए पनि चाप धान्न भने समस्या हुने अस्पतालले जनाएको छ।

सेती प्रादेशिक अस्पतालका मेसु डा. हेमराज पाण्डेयले भने प्रसूति सेवा बन्द गर्न सामाजिक विकास मन्त्रालयबाट निर्देशन आएको तर जनशक्तिको विषयमा कुनै निर्णय नभएको बताए। उनले सेतीको प्रसूति वार्डमा कार्यरत चिकित्सक र अन्य स्वास्थ्यकर्मीलाई नवजीवनमा पठाउने वा नपठाउने बारे कुनै निर्णय नभएको बताए।

सामाजिक विकास मन्त्रालयका स्वास्थ्य महाशाखा प्रमुख नरेन्द्र कार्कीले नवजीवनले जनशक्ति माग गरे व्यवस्थापन गर्न सकिने बताए। नवजीवनमा सरकारको आमा सुरक्षा कार्यक्रम लागू भएको छ।

प्रतिक्रिया दिनुहोस्