त्रिकोणात्मक शृंखलामा पहिलो पटक नेपालको दुई सय रन पूरा

काठमाडौं– ‘विश्वकप क्रिकेट लिग–२’अन्तर्गत जारी त्रिकोणात्मक शृंखलामा नेपालले ओमानविरुद्ध दुई सय रन पूरा गरेको छ।

टस हारेर ब्याटिङ गरिरहेको नेपालले ४२.३ ओभरमा ६ विकेट गुमाएर दुई सयको आँकडा पार गरेको हो।

जारी शृंखलामा नेपालले पहिलो पटक यो उपलब्धि हासिल गरेको हो।

त्यसअघि गत बुधबार शृंखलाको आफ्नो पहिलो खेलमा नेपालले ओमानविरुद्ध १७९ रन बनाएको थियो। यस्तै, गत शनिबार भएको शृंखलाको आफ्नो दोस्रो खेलमा नेपालले अमेरिकाविरुद्ध १९० रन जोडेको थियो।

जारी खेलकाे ४२.३ ओभरमा नेपालका विनोद भण्डारी १७ रनमा खेलिरहँदा करन केसी ० रनमा खेलिरहेका छन्।  

नेपालका सुवास खकुरेल २२, पारस खड्का ३८, दीपेन्द्रसिंह ऐरी ०, कप्तान ज्ञानेन्द्र मल्ल ५६ र कुशल मल्ल तथा आरिफ शेख २८-२८ रनमा आउट भएका थिए।