काठमाडौं - नेपाल सरकारले चीनलाई एक लाख थान 'मास्क' प्रदान गरेको छ। कोरोना भाइरसको संक्रमण चीनमा बढीरहेको अवस्थामा सहयोगस्वरुप नेपालले चीनलाई उक्त संख्यामा मास्क उपलब्ध गराएको हो।
परराष्ट्र मन्त्रालयले शुक्रबार विज्ञप्ति जारी गर्दै चीन र नेपाल बीचको सम्बन्धको उपहार स्वरुप चीनका जनतालाई मास्क उपलब्ध गराएको जानकारी दिएको छ। परराष्ट्र मन्त्रालयमा आयोजित कार्यक्रममा नेपालका लागि चिनियाँ राजदूत होउ यान्कीलाई परराष्ट्रमन्त्री प्रदीपकुमार ज्ञवाली र स्वास्थ्य तथा जनसङ्ख्यामन्त्री भानुभक्त ढकालले मास्क हस्तान्तरण गरेका थिए।
चीनमा कोरोना भाइरस संक्रमणबाट ज्यान गुमाउनेको संख्या ६३६ पुगेको छ। चीनका स्वास्थ्य अधिकारीका अनुसार ३१ हजारभन्दा बढी संक्रमित छन्। भाइरस संक्रमणबाट बिहीबार ७३ जनाको ज्यान गएको थियो।