काठमाडौं– ‘विश्वकप क्रिकेट लिग २’को त्रिकोणात्मक एकदिवसीय शृंखलाअन्तर्गतको पहिलो खेलमा ओमानले नेपालसामु १९८ रनको मध्यम लक्ष्य प्रस्तुत गरेको छ।
काठमाडौंको कीर्तिपुर क्रिकेट मैदानमा जारी खेलमा ओमानले निर्धारित ५० ओभरको खेलमा ९ विकेट गुमाएर १९७ रन जोडेको हो।
ओमानका लागि मोहम्मद नदीमको अविजित रहँदै ६९ रन बनाए। यस्तै, सन्दीप गौडले ३३, नशिम खुसीले २८, कप्तान जिशान मक्सुदले २० र अक्युब इल्लासले १६ रनको योगदान दिए। अन्य खेलाडीले दोहोरो अंकको रन जोड्न सकेनन्। बिलान खान ७ रनमा अविजित रहे
नेपालका लागि करन केसीले सर्वाधिक चार विकेट लिए। ९ ओभर बलिङ गरेका उनले १ मेडन राख्दै ४७ रन खर्चिए।
एकदिवसीय खेलमा डेब्यु गरेका सुशान भारीले तीन विकेट चट्काए। उनले १० ओभरमा १ मेडन राख्दै १४ रन मात्रै खर्चिए।
यस्तै, दीपेन्द्र सिंह ऐरीले एक विकेट लिए। ऐरीले एक खेलाडीलाई रनआउन पनि गरे।
नेपालले केही बेरमा जवाफी ब्याटिङ थाल्नेछ।
नेपाल, ओमान र अमेरिका सम्मिलित शृंखला माघ २९ गतेसम्म चल्नेछ।