काठमाडौं– गोरखा फुजेलकी गंगामाया अधिकारीले न्यायका लागि संयुक्त राष्ट्रसंघ गुहारेकी छन्।
सशस्त्र द्वन्द्वका बेला हत्या गरिएका छोरा कृष्णप्रसादका हत्यारामाथि कारबाही माग गर्दा पतिसमेत गुमाएकी गंगामायाले नेपालमा न्याय नपाएपछि संयुक्त राष्ट्रसंघ गुहारेको बताएकी छन्।
उनले मंगलबार संयुक्त राष्ट्रसंघको नेपालस्थित प्रमुख भेलेरिया जुलियन्डलाई भेटेर न्यायका लागि सहयोग मागेकी हुन्।
गंगामाया मानव अधिकारकर्मीको टोलीसहित जुलियन्डलाई भेट्न नेपालस्थित राष्ट्रसंघको कार्यालयमा पुगेकी थिइन्।
भेटमा सहभागी वरिष्ठ मानवअधिकारकर्मी चरण प्रसाईले जुलियन्डले गंगामायालाई सक्दो सहयोग गर्ने आश्वासन दिएको बताए।
‘जुलियन्डले संयुक्त राष्ट्रसंघको क्षेत्राधिकारभित्र रहेर न्यायका लागि सक्दो सहयोग गर्ने वचन दिनुभएको छ’ प्रसाईले भने, ‘उहाँहरुबीच १ घण्टा कुराकानी भएको थियो।’
कृष्णप्रसादको २०६१ साल जेठ २४ गते अपहरणपछि तत्कालीन माओवादी कार्यकर्ताले हत्या गरेका थिए।
छोराको न्यायका लागि अनशनरत अवस्थामामै गंगामायाका पति नन्दप्रसाद अधिकारीको पनि ज्यान गएको छ।
उनको शव त्रिवि शिक्षण अस्पतालको मुर्दाघरमा छ।