काठमाडौं - नेपाली क्रिकेट टोलीका मुख्य प्रशिक्षक उमेश पटवालले राजीनामा दिएका छन्। काठमाडौंमा हुन लागेको लिग-२ अन्तर्गतको ट्राइसिरिज सकिएलगत्तै लागू हुने गरि उनले राजीनामा दिएका हुन्। उनले अन्तर्राष्ट्रिय क्रिकेट काउन्सिलमा राजीनामा बुझाएका छन्।
गत जेठमा नेपाली टोलीको मुख्य प्रशिक्षकमा उनलाई एक वर्षका लागि आईसीसीले नियुक्त गरेको थियो। त्यसबेला क्यान आईसीसीको निलम्बनमा रहेको थियो। पटवालले सम्झौता बाँकी रहँदै राजीनामा बुझाएका हुन्। उनले नेपाललाई सन् २०२० को विश्वकपमा पुर्याउने लक्ष्य रहेको बताएका थिए। तर, साउनमा सिंगापुरमा भएको टी–२० को विश्वकप छनोटको एसिया फाइनलमा नै नेपाल चुक्न पुग्यो।
पटवालले आईसीसीबाट मासिक सात हजार अमेरीकी डलर पारिश्रमिक लिँदै आएका छन्। पटवालको प्रशिक्षणमा नेपालले खासै ठूलो उपलब्धि भने हासिल गर्न सकेको छैन।
क्यानका सचिव अशोकनाथ प्याकुरेलले क्यानमा पनि राजीनामा हल्ला आएको बताए। नेपालसमयसँग कुरा गर्दै उनले भने, ‘हामीले पनि राजीनामा दिएको हल्ला सुनेका हौं। आधिकारीक रुपमा केही पनि आएको छैन। तर, यसबारे कुरा आइरहेको छ।’
पर्सी(माघ २२) बाट नेपालमा लिग-२ अन्तर्गतको खेल आयोजना हुँदै छ।