५५ किलो गाँजासहित ६ जना पक्राउ

काठमाडौं– सिन्धुली प्रहरीले ५५ केजी गाँजासहित ६ जनालाई पक्राउ गरेको छ।

तीन वटा मोटरसाइकलमा हरिहरपुरगढी–७ केमनचुलीको कच्ची सडकबाट सर्लाहीतर्फ लैजाँदै गरेको गाँजासहित उनीहरूलाई पक्राउ गरिएको प्रहरीले जनाएको छ।

प्रहरीले पक्राउ परेकालाई सोमबार पत्रकार सम्मेलन गरेर सार्वजनिक गरेको छ।

जिल्ला प्रहरी कार्यालयका प्रवक्ता डीएसपी श्यामबहादुर खत्रीका अनुसार पक्राउ पर्नेमा हरिहरपुरगढी गाउँपालिका–७ का १८ वर्षीय सन्तोष स्याङ्तान र आकाश बल, २४ वर्षीय अंकित मोक्तान र २४ वर्षीय सरोज स्याङतान, मरिण गाउँपालिका–२ का ३५ वर्षीय तिलकध्वज मोक्तान र सर्लाही वागमती नगरपालिकाका २४ वर्षीय श्रवणकुमार वाइवा छन्।

उनीहरुलाई जिल्ला प्रहरी र क्यानेश्वर प्रहरी चौकीबाट खटिएको टोलीले पक्राउ गरेको हो। उनीहरुले पाँच किलोग्रामका ११ वटा पोका बनाएर गाँजा लैजाँदै गरेको अवस्थामा पक्राउ गरिएको खत्रीले बताए।

उनीहरुले प्रयोग गरेका ना.५८प. ८५१, ना. ४६ प. २३१० र ना.७ प. २४१६ नम्बरका मोटरसाइकल, ६ वटा मोबाइल एवं केही नगद बरामद गरिएको प्रहरीले जनाएको छ।