काठमाडौं– यौन दुर्व्यवहारको आरोप लागेका प्रहरी वरिष्ठ उपरीक्षक (एसएसपी) शौरभ राणाले आत्मसमर्पण गरेका छन्।
संघीय प्रहरी इकाई कार्यालय धरानमा कार्यरत एसएसपी राणाविरुद्ध जिल्ला अदालत सुनसरीबाट पक्राउ पुर्जी जारी भएपछि आइतबार दिउँसो उनी आफै जिल्ला प्रहरी कार्यालयमा उपस्थित भएको सुनसरीका प्रहरी उपरीक्षक (एसपी) यज्ञराज पोखरेलले जानकारी दिए।.
राणाविरुद्ध जबरजस्ती करणीको अभियोगमा बिहीबार किटानी जाहेरी परेको थियो। जाहेरी दिने महिलाले एसएसपी राणाले इटहरीको एक होटलमा आफूमाथि यौन दुर्व्यवहार गरेको आरोप लगाएकी छन्।
उनको धरानकै वीपी कोइराला स्वास्थ्य विज्ञान प्रतिष्ठानमा स्वास्थ्य परीक्षण गरिएको थियो।
एसपी पोखरेलले राणा प्रहरी नियन्त्रणमा रहेको र थप अनुसन्धान भैरहेको बताए।