काठमाडौं - शहीद स्मारक ए डिभिजन लिग फुटबल प्रतियोगितामा फ्रेण्ड्स क्लबले च्यासल युथ क्लबलाई पराजित गरेको छ। त्रिपुरेश्वरस्थित दशरथ रङ्गशालामा आज भएको पहिलो खेलमा फ्रेण्ड्स क्लबले च्यासललाई १–० ले पराजित गरेको हो।
फ्रेण्ड्सको जितमा उत्तम राई नायक बने । उनले खेलको ८४औं मिनेटमा गरेको गोल नै फ्रेण्डसका लागि निर्णायक गोल सावित भयो।
फ्रेन्ड्सका विश्व अधिकारीको फ्रिकिक बल च्यासलका गोलकिपर एलेन न्यौपानेले बचाएपछि आएको रिबाउन्ड बलमा उत्तमले गोल गर्न सफल भए। खेलमा फ्रेन्ड्सका गोलकर्ता उत्तम राई म्यान अफ दि म्याच घोषित भए।
जितसँगै फ्रेन्ड्स लिगको नवौं स्थानमा उक्लिएको छ। फ्रेन्ड्सले नौं खेलमा ११ अंक जोडेको छ। त्यस्तै पराजित च्यासल समान नौं खेलबाट नौं अंकसहित लिगको दशौँ स्थानमा छ।