४५ हजार युवालाई रोजगारी दिने प्रदेश सरकारको याेजना

जनकपुरधाम– वैदेशिक रोजगारीमा सबैभन्दा बढी युवा प्रदेश नम्बर २ बाट गएको तथ्यांकले देखाउँछ । प्रदेश २ का आठ जिल्लामध्ये सबैभन्दा बढी धनुषा र महोत्तरीबाट युवाहरु वैदेशिक रोजगारका लागि पलायन भएका छन् ।

प्रदेशभित्रै रोजगारीको अवसर दिएर युवाहरुलाई विदेश पलायनबाट रोक्न प्रदेश सरकारले योजना अघि सारेको छ । प्रदेश सरकारले तीन वर्षभित्र ४५ हजार युवालाई रोजगार दिनेगरी योजना ल्याएको हो । र, यसका लागि प्रदेश सरकारले दार्त निकाय डीएफआईडीसँग केही महिनाअघि सम्झौता गरेको थियो ।

डीएफआईडीसँग भएको सम्झौताअनुरुप पूर्वाधार निर्माणको काम सुरु भएको छ । गत साउन महिनामा भएको सम्झौताअनुसार विभिन्न सेवाप्रदायक संस्थाले रोजगार सिर्जना गर्ने कार्य थालनी गरेको छ ।

सोमबार मोरङ अटो वर्क्सले जनकपुरमा जेसीबी तालिम केन्द्रको आरम्भ गरेको छ भने रोजगारी पसलले यसअघि नै प्रदेश २ को विभिन्न स्थानमा घुम्ती रोजगारी पसला सञ्चालन गरेर बेरोजगार युवाहरुको लगत संकलन गरेर रोजगार उपलब्ध गराउने काम सुरु गरेको प्रदेश सरकारले जनाएको छ ।

यसैगरी सीप परियोजनाका साझेदार संस्था लेवल स्टेपले सर्लाहीको हरिवनमा गलैचा बनाउने तालिमको सुरुवात गरेको छ भने एसबीआई बैंकले वैदेशिक रोजगारमा जाने युवाहरुका लागि सहुलियत ऋण उपलब्ध गराउन सुरु गरेको छ । प्रभु बैंकले विहिबारदेखि यो योजना सुरु गर्न लागेको सीप परियोजनाका साविस अन्सारीले बताए ।

युवाहरुको प्रविधिमा पहुँच बढाउँदै रोजगार बनाउने योजनाअनुरुप युके एडको सहयोगमा प्रविधिमा महिला भन्ने कार्यक्रमसमेत बुधबारदेखि जनकपुरमा सुरु भएको छ ।

‘गर्ल्स इन टेक’ नाम दिइएको परियोजना जिनिस सोलुसन्स नामक गैरसरकारी संस्थाको सहकार्यमा थालनी भएको हो । लैङ्गिक असमानता हटाउन प्रविधिमा लगाव राख्ने किशोरीलाई शिक्षित एवं सशक्तिकरण गर्नु यस परियोजनाको उद्देश्य रहेको छ । परियोजनाअन्तर्गत सामाजिक रुपमा कमजोर पृष्ठभूमि बोकेका एक सय विद्यार्थीलाई छात्रवृत्तिसमेत प्रदान गर्नेछ ।

यसैगरी युके एडकै सहयोगमा जनकपुरलाई ‘क्यासलेस’ बनाउने योजनाअनुरुप आइएमईको सहयोगमा पैसा कार्डको समेत आरम्भ भएको छ ।