काठमाडौं - शहीद स्मारक ए डिभिजन लिग अन्तर्गत आज सम्पन्न खेलमा साविक विजेता मनाङ मर्स्याङ्दी क्लबले संकटा क्लबलाई हराएको छ। मनाङले संकटालाई ३-० गोलको फराकिलो अन्तरले पराजित गर्यो।
खेलको ४२ औं मिनेटमा संकटाका डिफेन्डर अमित तामाङले आफ्नै पोस्टमा गोल गरेपछि मनाङले एक गोल उपहारमा पाएको थियो। अग्रता बनाएको एक मिनेटभित्रै मनाङका अन्जन विष्टले अग्रतालाई दोब्बर बनाए। उनले ४३ औं मिनेटमा सानदार गोल गरे।
पहिलो हाफमा २-० को अग्रता बनाएको मनाङले दोस्रो हाफमा थप एक गोल गर्यो। खेलको ७१ औं मिनेटमा मनाङका निसान लिम्बूले गोल गरे।
जितसँगै मनाङले आफ्नो खातामा १९ अंक जोडेको छ। लिगमा अपराजित रहेको एकमात्र टिम मनाङले पाँख खेलमा जित र ४ बराबरी खेल्दै १९ अंक बनाएको हो। मनाङ अंक तालिकाको तेस्रो स्थानमा छ। दोस्रो स्थानमा रहेको मछिन्द्रको समान १९ अंक छ। त्यस्तै, २० अंकका साथ त्रिभुवन आर्मी क्लब शीर्षस्थानमा छ।