आन्तरिक सहमति जुटे पनि बस्न सकेन कांग्रेस केन्द्रीय समिति बैठक

काठमाडौं। असन्तुष्ट पक्षसँग सहमति गरेर डाकिएको कांग्रेस केन्द्रीय समिति बैठक बस्न सकेको छैन। बैठकका लागि पार्टी कार्यालय सानेपा पुगेका सभापति शेरबहादुर देउवालाई नेविसंघका कार्यकर्ताले अवरोध गरेपछि बैठक बस्न नसकेको हो। नेविसंघका दुई समूहबीच पार्टी कार्यालयमा हात हालाहाल नै भएको छ।

नेविसंघको एउटा गुट केही समयदेखि पार्टी कार्यालयमा अनशनरत छ ।

कांग्रेसले आज नेविसंघ केन्द्रीय कार्यसमिति घोषणाको तयारी गरेपछि कुन्दनराज काफ्ले निकट समूह विरोधमा उत्रिएको हो। उक्त समूहले विगत ४१ दिनदेखिको जारी रिले अनशनलाई आजबाट आमरण अनशनमा परिणत गरेको छ। विधानमा भएको व्यवस्थाबमोजिम ३२ वर्ष मुनिको उमेर समूहबाट तदर्थ समिति ल्याउनुपर्ने माग उक्त समूहको छ।

शुक्रबार बूढानिलकण्ठस्थित सभापति देउवाको निवासमा भएको सहमतिलाई केन्द्रीय समितिले अनुमोदन गरेपछि विवाद समाधान हुने विश्वास गरिएको थियो। देउवा निवासमा विवाद समाधानका लागि भएको सहमतिलाई अनुमोदन गर्न आज दिउँसो १ बजे कांग्रेसको केन्द्रीय समिति बैठक बोलाइएको थियो।

कतिपय विभाग र भातृ संगठनको नेतृत्व र भागवण्डाको हिसाब मिलाउन बाँकी नै छ कांग्रेसमा।

मंसिर २६ गतेदेखि केन्द्रीय समिति बैठक बहिस्कार गर्दै आएका वरिष्ठ नेता रामचन्द्र पौडेल र कृष्णप्रसाद सिटौला समूह पनि आजको बैठकमा सहभागी हुने बताइएको थियो।