आरबीबी–एनभीए राष्ट्रिय भलिबल क्लब च्याम्पियनसिपको फाइनल आज

काठमाडौं– पाँचौं आरबीबी–एनभीए राष्ट्रिय महिला तथा पुरुष भलिबल क्लब च्याम्पियनसिपका फाइनल खेल आज हुँदैछन्।

महिलातर्फको फाइनलमा भने एपीएफ र न्यु डाइमन्ड प्रतिस्पर्धा गर्दैछन्।

राजधानीको त्रिपुरेश्वरस्थित राष्ट्रिय खेलकुद परिषद् (राखेप)को कभर्डहलमा दिउँसो २ बजे खेल सुरु हुँदैछ।

एपीएफ नेपाल पुलिस क्लबलाई सेमिफाइनलमा ३–०को सोझो सेटमा पराजित गर्दै फाइनल पुगेको हो भने न्यु डाइमन्डले पनि त्रिभुवन आर्मी क्लबलाई ३–० कै सोझो सेटमा हराएर उपाधि भिडन्त गर्न लागेको हो।

यस्तै, पुरुषतर्फको फाइनलमा एपीएफ र हेल्प नेपाल स्पोर्टस् क्लब प्रतिस्पर्धा गर्दैछन्।

राखेपको कभर्डहलमा दिउँसो ४ बजे खेल सुुरु हुँदैछ।

यसअघि सेमिफाइनलमा एपीएफले त्रिभुवन आर्मीलाई ३–० को सोझो सेटमा हराउँदा हेल्प नेपाल स्पोर्टस्ले नेपाल पुलिस क्लबलाई ३–०कै सोझो सेटमा पराजित गरेको थियो।

नेपाल भलिबल संघको आयोजना र राष्ट्रिय वाणिज्य बैंकको प्रायोजनमा भइरहेको च्याम्पियनसिपमा पहिलो, दोस्रो र तेस्रो हुने टोलीले क्रमशः नगद २ लाख, १ लाख र ५० हजार रूपैयाँसहित मेडल, प्रमाण पत्र र ट्रफी प्राप्त गर्ने छन्।