काठमाडौं - काठमाडौंको टुँडिखेलमा प्रथम राष्ट्रिय काँठे लोकदोहोरी महोत्सव हुने भएको छ। भिजिट नेपाल र काँठे क्षेत्रका लोकदोहोरीलाई सहयोग पुर्याउने उद्देश्यका साथ महोत्सव आयोजना गर्न लागिएको हो।
डिएआर मुभिजको आयोजनामा हुने महोत्सव आउँदो फागुन १६ गतेदेखि २० गतेसम्म आयोजना हुने आयोजकले पत्रकार सम्मेलनमार्फत जानकारी दिएको छ। काँठे क्षेत्रको कला र संस्कृति हरेक नेपालीको सान, हाम्रै संस्कृतिको संरक्षण गर्ने हाम्रो अभियान भन्ने मूलनाराका साथ महोत्सव आयोजना गरिन लागेको कार्यक्रम संयोजक नमराज ढुंगानाले जानकारी दिए।
काठमाडौं आसपासका तत्कालिन ११ जिल्लालाई काँठे जिल्लाका रुपमा चिनिन्थ्यो। त्यहीँका लोकगीत, घाँसेगीत, सेलो, खैजेडी भजन, झाँक्रि, मारुनी, चुट्का, ठट्यौली, ठाडी, झाँकी, धिमेलगायतका गीतसँगीत तथा रहनसहन, खाना, वाध्यवादनm भेषभूषाको प्रवद्र्धन महोत्सवमा गरिने आयोजकले जनाएको छ।
महोत्सवमा खुला काँठे लोकगीत प्रतियोगितासमेत आयोजना गरिने छ। प्रतियोगितामा प्रथम हुनेले तीन लाख, दोस्रोले दुई लाख, तेस्रोले एक लाख र तथा सान्त्वना पुरस्कार ५० हजार प्रदान गरिने छ।
महोत्सव प्रवेश निशुल्क रहने छ।