राष्ट्रियसभा निर्वाचन जारी, मुख्यमन्त्री राउतले गरे मतदान

जनकपुरधाम– प्रदेश २ मा राष्ट्रियसभाका चार सिटको लागि मतदान सुरु भएको छ। जनकपुरस्थित महेन्द्र नारायण निधि सांस्कृतिक केन्द्रमा बिहान १० बजेदेखि मतदान सुरु भएको हो ।

राष्ट्रियसभा सदस्य निर्वाचनमा प्रदेश २ बाट सबैभन्दा पहिले मुख्यमन्त्री लालबाबु राउतले मत खसालेका छन् । राउतले मतदान गरेपछि मतदान सुरु भएको थियो ।

बिहान १० बजेदेखि सुरु भएको मतदान अपरान्ह ४ बजेसम्म चल्ने निर्वाचन अधिकृत राजुकुमार खतिवडाले जानकारी दिए । मतदान सकेलगत्तै मतगणना सुरु गरी बिहिबारै अन्तिम परिणाम घोषणा गर्ने तयारी रहेको खतिवडाले बताए ।

राष्ट्रियसभा सदस्यको लागि भइरहेको निर्वाचनमा महेन्द्रनारायण निधि सांस्कृतिक केन्द्रभित्र प्रदेशसभा सदस्य र स्थानीय तहका अध्यक्ष, उपाध्यक्ष एवं प्रमुख, उपप्रमुखका लागि छुट्टै मतदानस्थल तोकिएको छ ।

चार सिटको लागि भइरहेको निर्वाचनमा प्रदेश २ बाट आठजना उम्मेदवार चुनावी प्रतिस्पर्धामा छन् । निर्वाचनमा नेकपाले राजपा र कांग्रेसले समाजवादी पार्टीसँग तालमेल गरेको छ ।

नेकपाबाट राधेश्याम पासवान र तुलसा दाहाल, राजपाबाट मृगेन्द्रसिंह यादव र शेखरप्रसाद सिंहले उम्मेदवारी दिएका छन् । यसैगरी नेपाली कांग्रेसबाट भोला पंजियार र नगिनादेवी यादव तथा समाजवादी पार्टीबाट रामपृत पासवान र अनिरुद्ध सिंह चुनाव लडेका छन् ।

प्रदेश २ मा १०७ प्रदेशसभा सदस्य, स्थानीय तहका अध्यक्ष, उपाध्यक्ष तथा प्रमुख, उपप्रमुख २७१ सहित जम्मा ३७९ मतदाता छन् । जसमध्ये प्रदेशसभामा नेकपाको ३२ र स्थानीय तहबाट ८३ जना मतदाता रहेको छ ।

यसैगरी राजपालाई प्रदेशसभामा २५ र स्थानीय तहबाट ५४, समाजावदी पार्टीलाई प्रदेशसभामा ३० र स्थानीय तहमा ५३ र नेपाली कांग्रेसलाई प्रदेशसभामा १९ र प्रमुख–उपप्रमुखसहित ८१ जना मतदाता रहेको छ ।