काठमाडौं– तोकिएको समयमा सरकारले माग पूरा नगरेपछि उखु किसानले पुनः आन्दोलनको घोषणा गरेका छन्। सरकारसँग ५ बुँदे सहमति गर्दै काठमाडौंबाट फर्केका उखु किसानले सर्लाहीको मलंगवाबाट आन्दोलनको घोषणा गरेका हुन्।
आन्दोलनको कार्यक्रमअनुसार शुक्रबारबाट उखु किसानले हातमा कालो पट्टी बाँधेर काम गर्नेछन्। माघ ११ देखि १७ गतेसम्म गाउँगाउँमा जागरण अभियान संचालन गर्ने उनीहरुको कार्यक्रम छ।
माघ १८ गते सर्लाहीकै गोडैतामा किसान भेला गरी काठमाडौं केन्द्रीत आन्दोलनबारे निर्णय लिइने संघर्ष समिति सर्लाहीका अध्यक्ष रामस्वार्थ रायले जानकारी दिएका छन्।
यता सरकारले भने उखु किसानको बाँकी रकम नदिएका तीनवटा चिनी मिलको खाता रोक्का गर्ने तयारी गरेको छ भने सम्पर्कमा नआएका चिनी मिल मालिकहरुलाई पक्राउका लागि निर्देशन दिएको छ।