मोरङ- विराटनगरमा कलेजका विद्यार्थी बोकेको बस दुर्घटना हुँदा एक जनाको मृत्यु भएको छ भने ६ जना विद्यार्थी घाइते भएका छन् ।
मृत्यु हुनेमा ३२ वर्षीय गाडी धनी सानुकुमार साह रहेको प्रहरीले जनाएको छ । रंगेलीबाट विद्यार्थी बोकेर विराटनगरतर्फ आउँदै गरेको लर्ड बुद्ध हाइयर सेकेण्डरी स्कुलको मे १ ख १४९० नम्बरको बस घुम्तीमा अनियन्त्रित भइ दुर्घटना भएको हो ।
दुर्घटनामा परेर गम्भीर घाइते भएका साहको उपचारका क्रममा विराटनगरको न्युरो अस्पतालमा मृत्यु भएको इलाका प्रहरी कार्यालय रंगेलीका प्रहरी निरीक्षक लेखनाथ दाहालले नोपल समयलाई जानकारी दिए ।
सितलहरसँगै लागेको बाक्लो हुस्सु लागेको समयमा विपरित दिशाबाट आउँदै गरेको अर्को गाडीलाई साइड दिने क्रममा बस सडकबाट पल्टिएको प्रहरीको प्रारम्भिक अनुसन्धानबाट खुलेको छ । बस चालक खिलबहादुर खड्कालाई प्रहरीले नियन्त्रणमा लिएको छ।