हिमपहिरोका बेपत्ताको खोजीमा सेना खटियो

काठमाडौं- यही माघ ३ गते कास्कीको अन्नपूर्ण आधार शिविरमा आएको हिमपहिरोमा बेपत्ता भएकाहरुको खोजी नेपाली सेनाले थालेको छ। हिमपहिरोमा परी तीन नेपाली र चार कोरियाली नागरिकसहित ७ जना बेपत्ता भएका छन्।

बेपत्ताहरुको खोजी कार्य जारी रहे पनि हालसम्म उनीहरु फेला पर्न सकेका छैनन्। लगातार परेको हिउँ र चिसोका कारण उद्धारमा समस्या हुँदै आएको कास्कीका प्रहरी प्रमुख एसपी दानबहादुर कार्कीले जानकारी दिए। बेपत्ताको खोजीका लागि यसअघि हेलिकप्टरसमेत प्रयोग गरिएको थियो। सेनासहित नेपाल प्रहरी, पथप्रदर्शक (गाइड) को टोलीसमेत खोजी कार्यमा सहभागी भएको छ।

नेपाली पथप्रदर्शक सरोज परियार, सहयोगी मीनबहादुर लामा (तामाङ) र छिरिङ भोटे तथा कोरियन नागरिक लि मिन सु, जोङ्गपिल बोङ्ग, किम सोक जा र चोइ जो वोन अझै फेला पर्न सकेका छैनन्। हिमपहिरोमा परेका केहीको भने हेलिकप्टरमार्फत् उद्धार गरिएको थियो।