काठमाडौँ — प्रमुख प्रतिपक्षी नेपाली कांग्रेसले सभामुखमा उम्मेदवारी नदिने भएको छ।
सिंहदरबारस्थित संसदीय दलको कार्यालयमा मंगलबार बसेको संसदीय दल कार्यसमिति बैठकले सभामुखमा उम्मेदवारी नदिने र नेकपाको उम्मेदवारलाई पनि समर्थन नगर्ने निर्णय गरेको सचेतक पुष्पा भुसालले जानकारी दिइन्।
उनका अनुसार संसद्मा नेकपाको बहुमत रहेकाले कांग्रेस तटस्थ बस्ने निर्णय गरेको हो ।
त्यस्तै, राष्ट्रिय सभा निर्वाचनका लागि ध्यान केन्द्रित गर्ने निर्णय गरेको पनि उनले जानकारी दिइन्।
संसद् सचिवालयले आज (मंगलबार) बिहान ११ बजेदेखि २ बजेसम्म सभामुखमा उम्मेदवारी दर्ता गराउने समय तोकेको छ।
भुसालका अनुसार सभामुख र उपसभामुखमध्ये एक पद कांग्रेसलाई दिन नेकपा तयार भए मिलेर जाने नभए विपक्षीको गठबन्धन बनाएर अगाडि बढ्ने पनि बताइन्।
संविधानमा एउटै दल र लिंगको सभामुख र उपसभामुख बन्न नपाउने व्यवस्था भएकाले नेकपाले एक पद छोड्नै पर्ने बाध्यता छ।
नेकपाले सभामुखमा नेता अग्नि सापकोटालाई उम्मेदवार बनाउने निर्णय गरिसकेको छ।