डेढ किलो चरेससहित वडासदस्य पक्राउ

बाजुरा- बाजुराको बडिमालिका नगरपालिका–३ रजालीका वडा सदस्य श्यामबहादुर खड्का चरेससहित पक्राउ परेका छन् ।

उनीसँगै प्रहरीले गौमूल गाउँपालिका–१ हाल मार्तडीमा होटल व्यवसाय गर्दै आएका देवबहादुर रोकायालाई पनि चरेसको कारोबार गरेको आरोपमा पक्राउ गरेको छ ।

उनीहरुलाई आइतबार राति बडिमालिका नगरपालिका–९ गैरी बजारबाट डेढकिलो चरेससहित पक्राउ गरेको जिल्ला प्रहरी कार्यालयले सोमबार पत्रकार सम्मेलन गरेर जानकारी दिएको हो । उनीहरुलाई पनि सोमबार सार्वजनिक गरिएको छ ।

प्रहरी नायब उपरीक्षक टङ्कप्रसाद भट्टाईका अनुसार प्रहरी सहायक निरीक्षक शेरबहादुर थापाको गस्तीले गैरीबजारमा कालो झोलामा लुकाएर ल्याएको चरेस लिएर भाग्दै गरेको अवस्थामा पक्राउ गरेको हो ।

पक्राउ परेका दुवैलाई लागुऔषध अपराध ऐन २०३३ अनुसार कारवाही गरिने प्रहरीले जनाएको छ ।