जनकपुरधाम– राष्ट्रियसभा सदस्य निर्वाचन हुन चार दिनमात्र बाँकी छँदा राष्ट्रिय जनता पार्टी (राजपा) ले आफ्ना मतदाताहरुलाई ह्वीप जारी गरेको छ । शनिबार बबरमहलस्थित राजपाको केन्द्रीय कार्यालयमा बसेको अध्यक्षमण्डलको बैठकले गठबन्धनका उम्मेदवारलाई अनिवार्य मत दिन आफ्ना मतदाताहरुलाई ह्वीप जारी गरेको हो ।
राष्ट्रियसभा निर्वाचनका लागि प्रदेश २ मा राजपाले नेकपासँग तालमेल गरेको छ । राजपाले मृगेन्द्रकुमार सिंह यादव र शेखरकुमार सिंहलाई उम्मेदवार बनाएको छ भने नेकपाको तर्फबाट तुलसा दाहाल र राधेश्याम पासवानले टिकट पाएकाछन् ।
‘राष्ट्रियसभा निर्वाचनमा अनिवार्य रुपले उपस्थित भई आफ्नो अमूल्य मत दिई गठबन्धनमा रहेका चारवटै उम्मेदवारलाई विजयी बनाउन पार्टी अध्यक्षमण्डलको निर्णयअनुसार राजपा नेपालका मतदाताहरुलाई अत्यावश्यक निर्देशन (ह्वीप) जारी गरिन्छ,’ अध्यक्षमण्डलका संयोजक राजेन्द्र महतोले बैठकपछि जारी गरेको विज्ञप्तिमा भनिएको छ ।
राष्ट्रियसभा सदस्यको टिकट वितरण र नेकपासँग तालमेलका कारण निर्वाचनमा ‘फ्लोर क्रस’हुने सम्भावना बढेपछि राजपाले यस्तो ह्वीप जारी गरेको हो ।