एमएम कप फाइनल : त्रिभुवन आर्मीद्वारा नेपाल पुलिससामु १८५ रनको लक्ष्य प्रस्तुत

काठमाडौं – मनमोहन मेमोरियल (एमएम) कप एकदिवसीय राष्ट्रिय क्रिकेट प्रतियोगिताको फाइनल खेल चलिरहेको छ।

सुनसरीको इनरुवा क्रिकेट मैदानमा जारी खेलमा टस हारेर ब्याटिङको निम्तो पाएको त्रिभुवन आर्मीले नेपाल पुलिस क्लबलाई एक सय ८५ रनको लक्ष्य दिएको छ।

त्रिभुवन आर्मी क्लबले ४८.५ ओभरमा सबै विकेट गुमाउँदै एक सय ८४ रन बनायो। त्रिभुवन आर्मीका लागि विनोद भण्डारीले सर्वाधिक ४० रनको योगदान दिए। ६६ बल खेलेका उनले आफ्नो पारीमा ४ चौका प्रहार गरे। ओपनिङमा आएका राजु रिजालले २२ रन जोडे भने उनीसँगै आएका अनिल मण्डलले दोहोरो अंकमा रन ल्याउन सकेनन् ।

खेलमा रोहित पौडेलले ११, राजेश पुलामीले ३१, कुशल मल्लले १३ र विक्रम शोवले १५ रन जोडे। पहिलो पारीमा एक मात्रै छक्का रोहितले प्रहार गरे। यसबाहेक अन्य खेलाडीले दोहोरो अंक जोड्न सकेनन् ।

उता, बलिङतर्फ दीपेन्द्र सिंह ऐरी, ललित राजवंशी र सागर ढकालले समान ३ विकेट लिए। पवल शर्राफले एक विकेट चट्काए।

नेपाल पुलिसले केहीबेरमा जवाफी ब्याटिङ गर्नेछ।