काठमाडौं- पाकिस्तानमा हिम पहिरोमा पुरिएकी एक १२ वर्षीया बालिकाकाे १८ घण्टापछि जिवितै उद्धार गरिएको छ।
कश्मीर पीओकेमा हिम पहिरोमा पुरिएकी बालिकाको जिवितै उद्धार गरिएका त्यहाँका अधिकृतहरुले जनाएका छन्।
हिम पहिरोले पुरिएको घरभित्रबाट उद्धार गरिएको बालिकाको एउटा खुट्टा भाँचिएको छ। समीना बीबी नाम गरेकी ती किशोरीले आफू हिउँभित्र मर्छु जस्तो लागेको तर भगवानले आफूलाई बचाएको बताएकी छन्।
पीओकेको निलम भ्यालीमा सोमबार भएको हिम पहिरोमा परी अहिलेसम्म १ सय जनाको मृत्यु भैसकेको अनुमान गरिएको छ। जसमा ७४ जनाको शव निकालिएको छ।
समीनाले हिम पहिरो आएको थाहा पाएपछि आफू निक्कै चिच्याएको र त्यसैक्रममा आफू पुरिएको बताएकी छन्।
घटनामा उनकी आमाको पनि जिवितै उद्धार गरिएको छ। यद्यपि बैनी र भाइलाई भने उनले गुमाएकी छन्।
उद्धार गरिएका आमाछोरीलाई हेलिकोप्टरबाट मुज्जफराबादको एउटा अस्पताल लगिएको छ।