काठमाडौं– सरकारले देशभरका सबै जिल्लामा सामाजिक विकास कार्यालय स्थापना गर्ने तयारी गरेको छ।
सामाजिक सेवा क्षेत्रका काम प्रभावकारी बनाउन महिला, बालबालिका तथा ज्येष्ठ नागरिक मन्त्रालयले ७७ वटै जिल्लामा सामाजिक विकास कार्यालय खोल्ने तयारी गरेको हो।
यस विषयमा महिला, बालबालिका तथा ज्येष्ठ नागरिकमन्त्री पार्वत गुरुङले प्रदेशका सामाजिक विकास मन्त्रीहरूसँग ललितपुरमा छलफल गरेका छन्।
मन्त्री गुरुङसँगको छलफलमा प्रदेश १ का सामाजिक विकासमन्त्री जीवन घिमिरे, प्रदेश २ का नवलकिशोर साह, गण्डकी प्रदेशकी नरदेवी पुन, प्रदेश ५ का सुदर्शन बराल र कर्णाली प्रदेशका दल रावल सहभागी थिए। छलफलमा कार्यालय स्थापना गर्ने विषयमा सैद्धान्तिक सहमति जुटेको बताइएको छ।
सामाजिक विकास कार्यालय स्थापना भए सामाजिक क्षेत्रको कामलाई प्रभावकारी ढंगले अघि बढाउन सहज हुने मन्त्री गुरुङको विश्वास छ।