भीम आचार्य र अष्टलक्ष्मी शाक्य समाजवादीमा आएमात्रै विश्वासको मत दिन्छौं : झाँक्री

काठमाडौं– नेकपा (एकीकृत समाजवादी)की नेतृ रामकुमारी झाँक्रीले एमाले छाडेर समाजवादीमा आएमात्रै प्रदेश–१ र बागमतीका मुख्यमन्त्री भीम आचार्य र अष्टलक्ष्मी शाक्यलाई विश्वासको मत दिने बताएकी छन्। 

शनिबार विराटनगर विमानस्थलमा पत्रकारहरूसँग कुरा गर्दै नेतृ झाँक्रीले प्रदेशका मुख्यमन्त्रीहरू एमालेमै रहेको अवस्थामा एकीकृत समाजवादीले विश्वासको मत नदिने उनले स्पष्ट पारिन्। ‘एमाले छाडेर एकीकृत समाजवादीमा आए प्रदेश–१ र बागमतीका मुख्यमन्त्रीमा भीम आचार्य र अष्टलक्ष्मी शाक्यलाई विश्वासको मत दिन्छौं,’ उनले भनिन्। 

झाँक्रीले संघमा समाजवादीका कारण सरकार विस्तार प्रभावित नभएको दाबी गरिन्। उनले एकीकृत समाजवादी पार्टी निर्माणको चरणमै रहेको, निर्वाचन आयोगले जनप्रतिनिधिहरूलाई दल रोज्न दिएको समयसम्म पार्टीले पूर्णता नपाउने भएकाले अहिले नै सरकारमा जाने नजाने विषयमा कुनै निर्णय नभएको प्रस्ट्याइन्। पार्टी निर्माणले पूर्णता पाइनसकेकाले प्रदेश १ र बागमतीको मुख्यमन्त्रीमा पनि एकीकृत समाजवादीले दाबी नगरेको उनको भनाइ थियो।