बुधबार, असार ३१, २०७७

समाचार विशेष

कोरोना भाइरस : हतपतमा थप संकट निम्त्याउने काम नगरौं

1584079320Corona.jpg

कोरोना भाइरस संक्रमणको जोखिमबाट उत्पन्न तनावका कारण हामीले गर्ने गतिविधिले समस्या कम गर्नुभन्दा धेरै गुणा बढाउन सक्छन्, सचेत रहौं ।

कोरोेना भाइरस संक्रमणबाट विश्वभरमा मृत्यु हुनेको संख्या ११ हजार नाघेको छ। तीन लाखभन्दा धेरै मानिस यसको संक्रमणमा छन्। कोरोनाले गरिबदेखि धनाढ्य र शक्तिशाली कसैलाई पनि छोडेको छैन। भाइरसले विश्वभरमै चिन्ता बढाएको छ।

जानकारहरू भन्छन्– यही चिन्ताबीच हाम्रा गतिविधिले थप संंकट ननिम्तियोस् भनेर सचेत हुनु जरुरी छ।

रासन र अन्य वस्तुको अनावश्यक भण्डारण

अमेरिकादेखि नेपालसम्म मानिस किनमेलमा निकै जोड दिइरहेका छन्। खाद्यान्नदेखि स्यानिटाइजरसम्मको अनावश्यक खरिद र भण्डारणले बजारमा सामानको अभाव देखिन थालेको छ।

अप्ठ्यारो बेला आवश्यक पर्न सक्छ भन्दै मानिसहरु एक वर्षलाई पुग्ने नुन–चिनीको जोहो गर्न थाल्दा बजारमा नुन पाउन छाडिएको छ।

बजारमा अभाव हुँदा मूल्य वृद्धि हुन्छ कालोबजारी हुन्छ, जसलाई अत्यावश्यक छ उसले नपाउन सक्छ। सरकारले भने आवश्यक सामग्री र औषधिको पर्याप्त ‘स्टक’ रहेको र दैैनिक आपूर्तिमा संंकट नआउने बताइरहेको छ। त्यसैले अनावश्यक खरिद र भण्डारण नगरौं।

अस्पतालमा अनावश्यक भीड

अस्पतालहरुले सामान्य रुघाखोकी लाग्दा घरमै सुरक्षित तरिकाले बस्न, केही समय पर्खन सकिने शल्यक्रिया वा रुटिन परीक्षणका लागि अस्पताल नजान भनिरहेका छन्।

अस्पतालमा अनावश्यक भीडभाड बढ्दा एकातिर उपचार राम्रोेसँग हुन पाउँदैन भने अर्कोतिर संंक्रमण फैलने जोखिम धेरै हुन्छ। स्वास्थ्यकर्मीले पनि जोेखिमपूर्ण तरिकाले काम गर्नुपर्ने भएकाले अस्पतालमा भीड गर्नु राम्रो हुँदैन ।

घर छोडेर घुम्न जाने

कोरोना भाइरस संंक्रमणको जोखिम कम गर्न सरकारले अधिकांश कार्यालय बन्द गर्न निर्देशन दिएको छ। धेरै संघसंस्थाले कार्यालय बन्द गरेका छन्।

निरन्तर सामाचार सम्प्रेषण गरिरहने अनलाइन सञ्चारमाध्यमले पनि सम्भव भएसम्म कार्यालय बन्द गरेर घरबाटै काम गर्ने व्यवस्था मिलाउँदैछन्।

यस्तो बेला कतिपय व्यक्ति छुट्टी मनाउन भन्दै गाउँबाट सहरमा वा सहरबाट गाउँमा आफन्त भेट्न, घुम्न जाने क्रम चलेको छ। धेरैले यसलाई कोरोना संक्रमणबाट बच्ने उपायका रूपमा पनि लिइरहेका छन्।

तर, जानकारहरूका अनुसार यस्तो आवागमनले कोरोना संक्रमणको जोखिम झन् बढाएको छ। अहिले जो जहाँ छ, त्यहीं ‘सेल्फ क्वारेन्टाइन’ मा रहनु नै सर्वोत्तम उपाय हो।

त्यसमाथि युवामा आफूलाई कोरोना संंक्रमणले ठूलो समस्या नल्याउने भन्दै लापरबाही गर्ने प्रवृत्ति देखिएको छ। कोेरोना संक्रमणबाट युवामा ठूलो जोेखिम नभए पनि यसको विस्तारमा युवाको भूमिका हुन सक्छ।

संक्रमित युवालाई केही नभए पनि उनीहरूबाट घरका ज्येष्ठ सदस्यलाई वा अन्य रोगका बिरामीमा संक्रमण फैलियो भने त्यसले जटिल अवस्था आउन सक्छ। बढी सक्रिय रहने युवा झन् सचेत रहनुपर्ने जानकारहरू बताउँछन्।

घरमा रहँदा अनावश्यक तनाव नलिनुहोस्

कोेरोना भाइरसको जोखिम रोग प्रतिरोधी क्षमता (इम्युनिटी) कमजोर भएका व्यक्तिलाई बढी हुन्छ। तनाव धेरै हुँदा पनि शरीरको इम्युनिटी कम हुन सक्ने चिकित्सकहरू बताउँछन्।

कोरोना संक्रमणको जोखिम कम गर्न घरमै बसिरहेका वा संक्रमणको लक्षण देखिएपछि क्वारेन्टाइनमा रहेका व्यक्तिले पनि हमेसा यसैबारे सोेचेर तनाव लिनु उचित हुँदैन।

तनाव कम गर्न आफूलाई खुसी राख्ने, योेग गर्ने, सुरक्षित तरिकाले घरभित्रै खेल्न सकिने खेल खेल्ने वा अध्ययन गर्ने काम गर्नु उपयुक्त हुन्छ।


सामाजिक सञ्जालमा आउने अफवाहमा विश्वास नगर्नुहोस्

कोरोना भाइरस संक्रमणबाट तर्सिएका र घरमै बसिरहेका व्यक्तिहरू २४ सै घण्टा फेसबुक वा ह्वाट्सएपमा बर्सिरहेका ज्ञानमा भरोसा नगर्नुहोस्। यस्ता ‘ज्ञान’ मा कोरोेना भाइरसको घरेलु उपचारदेखि मन्त्रसम्मका कुरा हुन्छन्।

तपाईंलाई कोेरोना भाइरसबारे जानकारी लिनुछ भने स्वास्थ्य मन्त्रालयदेखि विश्व स्वास्थ्य संगठनसम्मका वेबसाइट छन् जहाँ प्रामाणिक जानकारी पाइन्छ।

सचेत रहनुहोस्, कैयौं अवस्थामा रोगभन्दा त्यसबारेको गलत जानकारी वा भ्रम बढी घातक हुन्छ।

प्रतिक्रिया दिनुहोस्