ए डिभिजन लिग फुटबल : सरस्वती युवा क्लबले १ अंक जोड्यो

काठमाडौं- शहिद स्मारक एक डिभिजन लिग फुटबलमा सरस्वती युवा क्लबले पहिलो अंक जोडेको छ।

अघिल्ला पाँच खेलमा पराजित भएको सरस्वतीले आइतबार भएको खेलमा ब्रिगेड ब्वाइज क्लबलाई गोलरहित बराबरीमा रोक्दै खाता खोल्न सफल भयो।

दशरथ रंगशालामा भएको खेलमा दुबै टिमले खासै राम्रो प्रदर्शन गर्न सकेनन्।

एक अर्काको पोस्टमा पनि दबाब दिन नसक्दा दुबै टिमले अंक बाँढेका हुन्। बराबरीपछि ब्रिगेड ब्वाइज सात अंक सहित आठौं स्थानमा छ।

उसले ६ मध्ये दुई जित, एक बराबरी र तीन हारको नतिजा निकालेको छ। सरस्वती तालिकाको पुछारमा छ।