काठमाडौं– सत्तारुढ नेपाल कम्युनिस्ट पार्टी (नेकपा)ले सभामुखको उम्मेदवारको टुंगो लगाउन नसकेपछि प्रतिनिधिसभा बैठक आज (आइतबार) फेरि स्थगित भएको छ।
सभामुखकाे उम्मेदवारमा सहमति खोज्न प्रधानमन्त्री निवास बालुवाटारमा आइतबार बिहान नेकपाका शीर्ष नेताहरूबीच भएको छलफल निश्कर्षविहीन बनेपछि सभामुखको कार्यतालिका बनाउन बस्ने भनिएको बैठक तेस्रो पटक स्थगित गरिएको हो।
प्रतिनिधिसभाको संसद् सचिवालयले सूचना जारी गरेर आगामी माघ ६ गतेसम्मका लागि बैठक स्थगित गरेको जनाएको छ।
प्रतिनिधिसभाको संसद् सचिवालयले जारी गरेको सूचनामा भने ‘विशेष कारणवश’ बैठक बस्न नसकेको उल्लेख छ।
यसअघि गत पुस ११ र १५ गते पनि प्रतिनिधिसभा बैठक स्थगित गरिएको थियो।
नेकपाका शीर्ष नेताबीच चलेको छलफलमा उपसभामुख शिवमाया तुम्बाहाङ्फे पनि सहभागी थिइन्। नेकपामा उपसभामुख तुम्बाहाम्फेलाई राजीनामा गराउने प्रयास भइरहे पनि उनले अस्वीकार गर्दै आएकी छन्।
यसअघि गत शनिबार बसेको नेकपा सचिवालयको बैठकले उपसभामुख तुम्बाहाम्फेलाई पदबाट राजीनामा दिन आग्रह गर्ने निर्णय गरेको थियो। तर, तुम्बाहाम्फेले सचिवालयको निर्णयलाई चुनौती दिँदै उपसभामुखबाट राजीनामा नदिने अडान राख्दै आएकी छन्।