सुनको मूल्य ताेलामा ९ सय घट्यो

काठमाडौं– पछिल्लो समय लगातार उकालो लाग्दै आएको सुनको मूल्य पुनः ओरालो लाग्न थालेको छ। नेपाल सुनचाँदी व्यवसायी महासङ्घका अनुसार आज (शुक्रबार) सुनको मूल्य प्रतितोला रु. ९०० ले घटेको छ । बुधबारको तुलनामा बिहीबार पनि प्रतितोला रु. एक हजारले सुनको मूल्य घटेको थियो ।
आज छापावाला सुनको मूल्य प्रतितोला रु. ७४ हजार ६०० र तेजाबी सुनको मूल्य प्रतितोला रु. ७४ हजार ३०० पुगेको छ । बिहीबार छापावाला सुनको मूल्य प्रतितोला रु. ७५ हजार ५०० र तेजाबी सुनको मूल्य प्रतितोला रु. ७५ हजार २०० पुगेको थियो । यस्तै चाँदीको मूल्य पनि सामान्य घटेको छ । बिहीबारको तुलनामा रु. १५ ले घटेर चाँदीको मूल्य प्रतितोला रु. ८८५ पुगेको छ ।

नेपालको इतिहासमा बुधबार सुनको मूल्य अहिलेसम्मकै उच्च विन्दुमा पुगेको थियो । महासङ्घले बुधबार छापावाल सुनको मूल्य प्रतितोला रु. ७६ हजार ५०० र तेजावी सुनको मूल्य प्रतितोला रु. ७६ हजार २०० निर्धारण गरेको थियो ।

सामान्य उतारचढावका बीच कारोवार भइरहेको सुनको मूल्य अमेरिका र इरानका बीचमा तनाव देखिन थालेपछि एकाएक उच्च वृद्धि भएको थियो । अहिले अन्तरराष्ट्रिय बजारमा पनि सुनको मूल्य वृद्धि भएको छ । आज अन्तरराष्ट्रिय बजारमा सुनको मूल्य प्रतिऔँस एक हजार ५४९.९५ र चाँदीको मूल्य प्रतिऔँस १७.९२ अमेरिकी डलरमा झरेको छ ।