काठमाडौं– सरकारले उर्जा सचिवको संयोजकत्वमा ट्रंक तथा डेडिकेटेड लाइनको समस्या समाधानका लागि अध्ययन समिति गठन गरेको छ। उर्जा सचिवको दिनेश घिमिरेको संयोजकत्वमा अध्ययन समितिको सदस्यमा उद्योग मन्त्रालयकी सचिव यमकुमारी खतिवडा र अर्थ मन्त्रालयका सचिव राजन खनाल र नेपाल विद्युत प्राधिकरणका कार्यकारी निर्देशक कुलमान घिसिङ रहेका छन् ।
समितिको सदस्य सचिवमा उर्जा मन्त्रालयका सहसचिव रहेका छन् । मन्त्रिपरिषद्को गत सोमबार बसेको बैठकले सो अध्ययन समिति गठनको निर्णय गरेको हो।
पछिल्लो समयमा उद्योगी र प्राधिकरणविच ट्रंक तथा डेडिकेटेड लाइनको समस्या आइरहेको छ । सो समस्या अदालत पनि पुगेको थियो । तर सो विवाद समाधान नभएपनि उद्योगीहरु उद्योग मन्त्रालय पुगेका थिए ।
उद्योग वाणिज्य तथा आपूर्ति मन्त्री लेखराज भट्टको पहलमा सो समिति गठन भएको हो । प्राधिकरणले पहिले उद्योगीहरुलाई छुट दिएको र अहिले करोडौको रुपैयाँका विल पठाएको भन्दै उद्योगिहरुले अदालत गएका थिए । तर अदालतले प्राधिकरणबाटै समस्या समाधान गर्न सकिने व्यवस्था भएको र सिधै अदालत आउन नहुने भन्दै पुनः प्राधिकरणबाट नै समस्या समाधान गर्न भनेको थियो ।