पश्चिम एसिया क्षेत्रका नेपाली श्रमिकको सुरक्षामा सरकारको चासो

काठमाडौं- सरकारले पश्चिम एसिया क्षेत्रमा जारी द्वन्द्वका विषयमा आफ्नो गम्भीर ध्यानाकर्षण भएको जनाएको छ।

परराष्ट्र मन्त्रालयले बिहीबार एक विज्ञप्ति जारी गर्दै उक्त क्षेत्रमा विकति पछिल्ला घटनाक्रमका विषयमा नेपाल चिन्तित रहेको जनाएको छ।

विज्ञप्तिमा उक्त क्षेत्र नेपाली श्रमिकहरुलाई रोजगारी प्रदान गर्ने क्षेत्र रहेको र त्यहाँ ठूलो संख्यामा नेपाली कामदार रहेकाले उनीहरुको सुरक्षा नेपालको मुख्य चासोको विषय रहेको उल्लेख गरिएको छ।

नेपालले उक्त क्षेत्रमा शान्तिलगायतका काम गरिरहेका निकायहरुलाई नेपाली श्रमिकको सुरक्षाका लागि गम्भीर बन्न आग्रहसमेत गरेको छ।

साथै विज्ञप्तिमा जारी द्वन्द्वको शान्तिपूर्ण समाधान खोज्न आग्रह गरिएको छ। नेपाल शान्तिपूर्ण रुपमा सबै समस्याहरुको हल गर्नुपर्ने कुरामा विश्वास राख्ने भएकाले त्यस क्षेत्रमा पनि समस्याहरुको शान्तिपूर्ण समाधाने होस् भन्ने चाहेको विज्ञप्तिमा जनाइएको छ।

पछिल्लो समय अमेरिका र इरानबीचको द्वन्द्वका कारण इराकलगायत पश्चिम एसियामा रहेका नेपाली कामदारहरुको सुरक्षाको चासो नेपालमा बढिरहेको छ।

इराकमा हाल करिब १५ हजार नेपाली कामदार रहेको अनुमान गरिएको छ। नेपालले इराकका लागि श्रम स्वीकृति नदिने भए पनि त्यहाँ विभिन्न माध्यमबाट ठूलो संख्यामा कामदार पुगेको आंकलन गरिएको छ।