काठमाडौं- कोरोना महामारीका कारण विदेशमा पनि ज्यान गुमाउने नेपाली संख्या लगातार बढ्दो अवस्थामा छ।
गैरआवासीय नेपाली संघ (एनआरएनए)का अनुसार साउदी अरबमा १२ जना नेपालीको कोरोना भाइरसका कारण मृत्यु भएको छ।
संघले संकलन गरेको तथ्यांकअनुसार भारतसहित विश्वभर २८ मुलुकमा रहेका साढे ४ सयभन्दा बढी नेपालीको कोरोना संक्रमणबाट मृत्यु भइसकेको छ।
एनआरएनए अन्तर्गतको स्वास्थ्य समितिका अनुसार हालसम्म विदेशमा ५४ देशमा १ लाख १६ हजार ६० जना नेपालीमा कोरोना संक्रमण देखिएको छ। ती मध्ये १ लाख ११ हजारभन्दा बढी नेपाली कोरोनामुक्त भएका छन्।
एनआरएनएले कोरोना भाइरसको महामारी सुरु भएदेखि विदेशस्थित नेपाली समुदाय, विदेशमा कार्यरत नेपाली चिकित्सक, नेपाली नियोग, संघसंस्था र संघका शाखाद्वारा प्राप्त सूचनाका आधारमा तथ्यांक संकलन गर्दै आएको छ।