शनिबार, कात्तिक १५, २०७७

अर्थ समाचार

नागरिक लगानी काेषले ल्यायो 'नागरिक पेन्सन योजना'

1584443472nagarik_lagani_kosh.jpg

काठमाडौं - सर्वसाधरणलाई लक्षित गरी नागरिक लगानी कोषले नागरिक पेन्सन योजना सुरु गरेको छ। कोषको ३० औं वार्षिकोत्सवको अवसरमा कोषले सो योजना सुरु गरेको हो।

वचत संकलनको दायरालाई फराकिलो बनाउनको लागि स्वरोजगार एवं वैदेशिक रोजगारीमा रहेका नेपालीलाई समेट्ने गरी नागरिक पेन्सन योजना सुरु गरिएको कोषले जनाएको छ।

योजनामा मासिक रुपमा आम्दानी गर्न सक्ने सर्वसाधारण सामेल हुन सक्ने कोषले जनाएको छ। यसका लागि कुनैपनि संस्थाको सिफारिस चाहिँदैन। व्यक्तिले चाहेमा पनि सहभागी हुन सक्नेछन्।

वार्षिकोत्सव कार्यक्रममा कोषका कार्यकारी निर्देशक रमण नेपालले पुँजी बजारको स्थायित्व र विकासमा अहम् भूमिका खेल्ने उद्देश्यले कोषले पुँजी बजारको विकास र विस्तारको लागि नागरिक स्टक डिलर कम्पनी लिमिटेड दर्ता गरिसकेको जानकारी गराए।

मुलुकको आर्थिक विकास र समृद्धि हासिल गर्न सरकारी, गैरसरकारी, राष्ट्रिय तथा अन्तर्राष्ट्रिय वित्तीय संस्थाहरूसँग सहकार्य गरी ठूला परियोजनाहरूमा लगानी गरी मुलुकको आर्थिक वृद्धिमा सहयोग पुर्‍याउन र मुलुकभित्र रोजगारी सिर्जना गर्न कोष लागिपरेको पनि कार्यकारी निर्देशक नेपालले बताए।

सो अवसरमा कोष संचालक समितिका अध्यक्ष प्रा.डा.रामचन्द्र भट्टराईले देशको आर्थिक वृद्धि दरमा टेवा पु्र्‍याउने, रोजगारी सिर्जना गर्ने एवं पूर्वाधार विकासका आयोजनाहरुमा लगानी विस्तार गरी सरकारको समृद्ध नेपाल बनाउने महाअभियानमा कोषले सहयोग पुर्‍याइरहेको बताए।

चालु आर्थिक वर्षको पुस मसान्तसम्ममा कोषले १ खर्ब ४० अर्ब ३९ करोड रुपैयाँ बराबरको स्रोत परिचालन गर्न सफल भएको छ। यो अवधिमा १ खर्ब ३८ अर्ब ५५ करोड रुपैयाँ लगानी गरेको छ।

सो अवसरमा कोषले वर्षको उत्कृष्ठ कर्मचारीको रुपमा रामेश्वर पुडासैनी, नेत्र बिक्रम थापा र पुरुषोत्तम पौडललाई पुरस्कृत गरेको थियो।

प्रतिक्रिया दिनुहोस्