काठमाडौं– सत्तारुढ दल नेकपाले केन्द्रीय समिति बैठक स्थगित गरेको छ। सचिवालयको आज बिहान बालुवाटारमा बसेको बैठकले पुस २३ का लागि डाकिएको केन्द्रीय समिति बैठ माघ १५ गतेका लागि सार्ने निर्णय गरेको हो।
माघ ९ गते हुने राष्ट्रियसभा निर्वाचनको तयारीमा नेताहरु व्यस्त रहनुपर्ने भएकाले बैठक सारिएको नेकपाले जनाएकाे छ।
२०७५ जेठ ३ गते तत्कालीन नेकपा (एमाले) र नेकपा (माओवादी केन्द्र)बीच एकतापछि जारी पार्टीको अन्तरिम विधान–२०७५ मा केन्द्रीय कमिटीको बैठक ५ महिनामा एक पटक बस्ने व्यवस्था भए पनि डेढ वर्षपछि नेकपाको केन्द्रीय कमिटीको बैठक बस्न लागेको हो। नेकपाको गत मङ्सिर २९ देखि पुस ६ गतेसम्म बसेको स्थायी कमिटी बैठकले केन्द्रीय कमिटीको बैठक डाकेको थियो।
केन्द्रीय कमिटीको बैठकमा अध्यक्षद्वय केपी शर्मा ओली र पुष्पकमल दाहाल ‘प्रचण्ड’को राजनीतिक प्रतिवेदन, विधान संशोधन, राष्ट्रिय अभियान सञ्चालन योजना र समसामयिक प्रस्ताव रहनेछ। विधानको प्रस्तावनामा परिवर्तनलगायत सचिवालय सदस्य वामदेव गौतमलाई उपाध्यक्ष बनाउने विषय स्थायी कमिटीले अनुमोदन गरेको थियो।